У августу 1889. року водзенє нашей парохиї у Новим Садзе превжал Йован Хранилович. До Нового Саду пришол зоз Коцура дзе до теди бул капелан. Йован Хранилович ше народзел 1855. року у Кричкох, у Далмациї, дзе му оцец Микола теди бул парох. Мац му була бароница Сидония Стручич. И оцец Микола бул поет, илирец, сотруднїк Ґайовей "Даници". Оцец ше народзел у Сошицох, у Жумберку, 1822. року, а ту у Сошицох и умар 1864. року, кед Йованови було лем дзевец роки. О. Микола Хранилович бул и осєцки викар. Микола и Сидония мали пецеро дзеци: Драґутина, двойнята Миколу и Йована, Марию и Владислава. Окрем Йована, и його младгаи брат Владислав бул священїк и у свой час парох у Сримскей Митровици.

Кед Йованови оцец умар, їх ше мац зоз дзецми преселєла до Крижевцох и ту Йован закончел основну школу, котру започал иіце у Сошицох. До ґимназиї ходзел у Загребе як питомец грекокатолїцкей семинариї. Уж у шестей класи ґимназиї, вєдно зоз познатим горватским писательом Антом Ковачичом, зявює ше на бокох "Буневецкей и шокецкей вили". Упознал ше и зоз Авґустом Шеноом. Перши рок богословских студийох закончел у Загребе, а вец пошол до Бечу, до "Барбареум", дзе студирал богословию, але слухал и преподаваня познатого слависти Миклошича и филозофа Бретана.

За священїка бул пошвецени 1878. року, нєоженєти. Зпочатку бул секретар владики Дюри Смичикласа, але то було кратко. Од 1879. до 1882. року вон на парохиї у Кашту, у Жумберку, а оталь прешол на парохию до Радатовичох, дзе остал до 1886. року. Праве час його пребуваня на парохиї у Радатовичох бул найплоднєйши у поглядзе поетскей творчосци. Бул повязани зоз велїма писателями. Мал вельо приятельох, котри приходзели до ньго. Вироятно прето занєдзбовал свойо священїцки обовязки на парохиї.

Його способ живота ше не пачел крижевскому владикови Илиї Храниловичови, котри бул и його родзина. Владика го зоз Радатовичох премесцел знова до Крижевцох за канцелара владическей канцелариї. Але, то не було добре ришенє. Чежко було владикови зоз Йованом, але ище чежше Йованови зоз владиком. Владика на перше место кладол свяїценїцки обовязки и длужносци, а Йован поезию и дружтвену дїялносц. Владика го знова премесцел до Жумберку, тераз на парохию до Сошицох, але шицко було даремне... И ту Йован жил так як му ше пачело... И случело ше же го владика 1877. року суспендовал. Йован на того реаговал на найгорши можлїви способне послухал владику. Аж го державни органи мушели склонїц.

Патраци нєшка з одредзеней историйней дистанци можеме повесц же и єден и други бул у праву. То озда и вони сами швидко обачели, помирели ше и пребачели себе. После того Йован Хранилович занавше охабя Жумберак. Од 1886. до 1889. року бул капелан у Коцуре, а у авґусту того року, як то уж спомнуте, постал парох у Новим Садзе.

И у Новим Садзе Хранилович мал зраженє зоз владиком, тераз Юлияном Дрогобецким. Випатра же державни власци гледали од владики Дрогобецкого же би Хранилович зменшал свою дїялносц, бо им завадзал таки револуционерни Хранилович. А кед Хранилович витрапени психичнима стресами и худобством замодлєл же би му ше дало шейц мешаци за лїчене-владика то одбил, гоч мал пред собу лїкарски потвердзеня, дияґнози и препорученя же би му ше дало таке хороване. Хранилович, заш лєм, пошол... И бул знова суспендовани. Тераз ше вон жалєл до Риму и у Риме му дали за право. Тоту моралну побиду Храниловичови винчовали: владика Й. Ю. Штросмаер, барски надвладика Милинович, загребски надвладика Посилович и други. После двох рокох Храни­лович бул врацени на парохию до Нового Саду и владика Дрогобецки му виплацел шицку плацу котру два року пре суспензию не доставал.

Року 1918. о. Йован Хранилович бул предсидатель Вслькей народней скупштини у Новим Садзе. на котрей були претергнути шицки вязи зоз Будимпешту и Войводина ше вияшнєла войсц до составу новей держави Сербох, Горватох и Словенцох-Югославиї. Висповедани и запричаїцани о. Йован Хранилович умар у Новим Садзе дня 5. августа 1924. року.