Року 1820. за пароха до Нового Саду приходзи Константин Потуричич, тиж Жумберчан. Мало ше о нїм зна. Нє зна ше кеди ше народзел, але ше зна же ше народзел у валалє Явор, цо припада парохиї у Мрзлим Полю. Нє зна ше дзе ше школовал, ані кеди и хто го пошвецел за священїка. Як священїк од 1816. до 1820. року службує у Шидзе и оталь приходзи до Нового Саду.

Ту, ище того самого року, почина будовац парохиялну церкву и парохиялни дом. Нє зна ше анї дзе, анї кеди умар. Може ше тримац же умар у Новим Садзе 1826. року, бо того року, заш зоз Шиду, до Нового Саду приходзи Микола Ґолеш, котри пред тим ту бул капелан. Дня 5. юлия 1820. року крижевски владика Константин Станич обвисцел Новосадски маґистрат же 11. юлия того истого року окончи пошвецанє фундаментох грекокатолїцкей парохиялней церкви у Новим Садзе, цо и зробел. Присутних на святочносци пошвецаня було барз вельо. Грамоту о тей подїї потписали владика Константин Станич и Йосиф Парчетич де Ракоц, поджупан сримски и кральовски комесар новосадски.

У вязи з тим пошвецаньом и тоту грамоту зявює ше и єдна дилема. Владика наявює же темелї пошвеци на 11. юлия, на Петра, а грамота датирана зоз 11. септембром 1820. року. Або ше роби о помильки у першей вистки, кед владика нявює пошвецанє за 11. юлий, або грамота написана и потписана познєйше, 11. септембра, цо мало вироятне, бо ше таки грамоти кладу до фундаментох под час пошвецаня. А то и спомнуте у грамоти.

Грамота написана на церковнославянским язику зоз кирилку. Ту є обявена у ориґиналу наздаваюци ше же будзе каждому розумлїва:

"Во имя Святия єдиносущний и нераздилїмия Тройци Отца и Сина и Святого Духа, в чест же Святих славних всехвалних и первопрестолних Апостолом Петра и Павла, управляющу католическою церковию Пию Седмому Папи Римскому и вселенскому Патриарху, царствующему всепреосвитлийшому, державнїйшому, и благочестиивийшому Царю нашему Франциску Первому Императору Аустрипскому и Кралю Унгарскому, сущу Палатину Унгарскому, яснєйшову Господину Йосифе верховнєйшому Князе Аустрипскому, владєющу Унгарскою Церковию Фирмаиу Примасу Унгарскому, Архиепископу Острогонскому и Греко-Католических Епископов и Митрополитов - при благородному Г. Иосифу Паузи Судиї Новосадскому и послу славному Маґистрату Новосадскому, пароху такожде Новосадскому Константину Пот-ричичу Столици судейския вармедїї Сримския присидателю и спомощнику єго Николаю Ґолешу Иєрею Крижевския Єпархиї и прочим достойнєйшим мирским и правосланим християном положися Камен сей во основаниїхрама тохожде Святих Апостол Константином Станич православним Епископом Крижевским Судейския Столици вармедїях Загребачкия, Вараждинския и Крижевския Присидателем, Философиї и Теолоґиї учителем дне 11. септ. (30. авґуста) 1820.

Потписи Йосифа Парчетича де Ракоц и владики Константина Станича на тей грамоти по латински. Ту и їх печаци. У чаше пошвецаня темельох у Новим Садзе бул капелан Микола Ґолеш, котри ище того самого року пойдзе до Шиду. Парохиялни дом у Новим Садзе бул швидко збудовани, ище того 1820. року, а церква ше будовала полни 18 роки. Закончели ю аж 1838. року, а поправдзе аж после буни 1849. року. Проекти за церкву зробел познати заґребски архитект Бартол Фелблинґер, медзитим, пре нєпознати нам причини, по тих ше проєктох нє робело.

Випатра же парох Константин Потуричич умар у Новим Садзе 1826. року. Нашлїдзел го його дакедишнї капелан Микола Ґолеш, котри ту пришол зоз Шиду. Микола Ґолеш, тиж Жумберчан, народзел ше1794. року у валалє Ґолеши, филияли парохиї у Радатовичох. Кед мал дзевец роки, пошол до семинариї у Загребе. Кед закончел богословски студиї, пол рока бул дзияк у Крижевцох, а вец єден рок робел у владическей канцелариї. За священїка бул пошвецени 1816. року. Вироятно же го пошвецел крижевски владика Константин Станич, бо вон у тот час бул на чолє Крижевского владичества. Нє знаме чи бул оженєти. По шицким випатра же од пошвецаня до 1820. року бул капелан у Новим Садзе, а вец парох у Шидзе. До Нового Саду, як уж спомнуте, приходзи 1826. року. Спочатку бул лєм администратор парохиї, а вец и парох. Року 1835. бул меновани за вицеархидиякона, як цо ше теди урядово у Крижевским владичеству волал протопресвитер або декан. Як вицеархидиякон мал досц бриґи зоз коцурским капеланом Миколом Докторовичом. Микола Ґолеш умар у купелї у Будиме 7. мая 1843. року у 50-им року свойого живота.