УВОДНЕ СЛОВО

Цо зме блїжей велькому ювилею, 250-рочнїци приселєня Руснацох до тих крайох, розпочати проект о. Романа Миза Священїки Осєцкого викарията - чия друга кнїжка, ниа, пред нами - вше ше баржей указує як єдинствене видавательне подняце по котрим ше будзе паметац нє лєм тот ювилей, але и вкупне доприношенє нашей историйнеи науки означованю тей значней рочнїци. Важносц и практична вредносц того проєкта вецейнїста. Насампредз, то перша кнїжка такого роду у нас котра представя своєродни лексикон шицких грекокатолїцких священїкох чийо походзенє або службованє у даякей вязи зоз руским и українским жительством Бачки, Сриму и Славониї. Як така, у условийох кед ище вше нє маме заокружену историю нашей Церкви од приселєня до нєшка, вона на одредзени способ компензує и тот недостаток, и представя добру информацию нє лєм о прешлосци, але и терашньосци Грекокатолїцкей Церкви на тих просторох. Конечно, кнїжка о. Романа Миза, як нови и ориґинални прилог историї Крижевскей епархиї, а у недостатку другей литератури, будзе и хасновити приручнїк зоз общей историї Крижевского владичества, а нє за нєзанєдзбованє анї други єй практични функциї.

Дзекуюци велькому проекту Священїки Осєцкого викарията, ширини залапеня историйно-биоґрафского материялу и авторовей акрибиї у приступу и обробки каждого поєдинєчного мена, велї дилеми з нашей церковней историї дефинитивно розчисцени и преставаю буц загадка за фаховцох и науку. Гоч ше то баржей одноши на мена и події котри нам часово оддалєнши, праве їх ошветльованє и вицагованє зоз цмоти историї науково найдрагоцинше: з нїма биографиї историйно найстарших священїцких менох поставаю блїзши и похоплївши, а кажда конкретна подія историйно яснєйша и фундаментованша. Систематизовани биографиї священїкох Осєцкого викарията помагаю лєпше похопиц нє лєм одредзени сегменти историї Крижевскей епархиї, але и одредзени периоди националней историї Руснацох и Українцох дакедишнєй и нєшкайшей Югославиї. Улога и заслуги наших священїкох на розвою духовного, културного, прос-витного и вообще националного живота руского и українского жительства Крижевскей епархиї нє мали и у началє познати. Та, заш лєм, аж з тоту кнїжку кажде їх доприношенє, гоч яке було мале, по перши раз ше може у описовим рядошлїду найсц на єдним месце, цо оможлївює лєгки и преглядни препатрунок, а вец и їх оцену -поєдинєчну и ґлобалну, за кажду особу окреме и шицких священїкох вєдно.

Портретуюци подоби сучасних нам священїкох, автор информує о малопознатих бокох живота и душпастирскей роботи наших парохох и капеланох, священїкох и монахох, познатих и менєй познатих служительох нашей Церкви, охабяюци о шицких документовани шлїдздогаднїк котри будзе тирвацо шведочиц о їх душпастированю медзи нашим народом, тераз и у каждей парохиї окреме. Биоґрафски податок у тим случаю нє ма лєм актуалну информативну функцию; вон у истей хвильки постава и моцни историйни факт, тирваца вредносц кнїжки и єй защитни знак. Священїш Осєцкого викарията. - то кнїжка-леґитимация наших духовних оцох од приселєня до нєшка и їх колективни памятнїк подзвигнути на чесц Церкви и народу.

Коцур, 31. мая 1994. року

Микола М. Цал: Уводне слово .................З

Священїки Осєцкого викарията ................5

Писма читачох ......................... 108